---
title: "حاسبة CTR"
description: "اكتب عدد الضغطات ومرات الظهور وخُد الـ CTR، أو احسب عدد الضغطات اللي هتجيلك من نسبة ضغط معيّنة. يعني إيه CTR؟ CTR اختصار Click-Through Rate، يعني نسبة الناس اللي ضغطت…"
url: "https://ahmed-abdelhamed.com/tools/ctr-calculator/"
date_published: "2026-11-11T15:50:16+00:00"
date_modified: "2026-11-20T02:54:25+00:00"
author: "أحمد عبد الحميد"
---

# حاسبة CTR

اكتب عدد الضغطات ومرات الظهور وخُد **الـ CTR**، أو احسب عدد الضغطات اللي هتجيلك من نسبة ضغط معيّنة.

## يعني إيه CTR؟

**CTR** اختصار Click-Through Rate، يعني نسبة الناس اللي ضغطت على الإعلان من كل اللي شافوه. وهو أول مؤشر بيقولك الإعلان شدّ الناس ولا عدّوا من جنبه.

CTR = عدد الضغطات ÷ مرات الظهور × 100

إعلان ظهر 80,000 مرة وجاله 1200 ضغطة: 1200 ÷ 80,000 × 100 = **1.5%**.

## الـ CTR بيقولك إيه وما بيقولكش إيه

الـ CTR العالي معناه إن الإعلان بيلفت النظر، والواطي غالبًا معناه إن الصورة أو أول ثانية في الفيديو أو العرض نفسه مش بيوقّف الناس. ودي أسرع حاجة تصلّحها بتجربة كرييتف جديد.

لكن الـ CTR مش هدف لوحده. إعلان بعنوان مثير ممكن يجيب ضغطات كتير من ناس مش هتشتري. علشان كده بصّ على الـ CTR مع **معدل التحويل** في الصفحة و**تكلفة النتيجة**. لو الـ CTR عالي والمبيعات قليلة، المشكلة غالبًا بعد الضغطة: في الصفحة، أو السعر، أو سرعة الموقع.

## انتبه لنوع الـ CTR في ميتا

مدير إعلانات ميتا بيعرض «CTR (الكل)» اللي بيحسب أي ضغطة على الإعلان، حتى على اسم الصفحة أو «عرض المزيد»، و«CTR لضغطات الرابط» اللي بيحسب الضغط اللي ودّى الموقع فعلًا. الرقم التاني هو اللي يهمك في حملات الزيارات والمبيعات.

## أسئلة شائعة

### إزاي أحسب الـ CTR؟

اقسم عدد الضغطات على مرات الظهور واضرب في 100. 1200 ضغطة من 80,000 ظهور يبقى CTR = 1.5%.

### إيه الـ CTR الكويس؟

بيختلف حسب المنصة والمجال ونوع الحملة، فقارن بإعلاناتك انت في نفس الحملة. الإعلان اللي الـ CTR بتاعه أعلى بكتير من باقي إعلاناتك غالبًا هو اللي يستاهل ميزانية أكتر، لو التحويل بعده كويس.

### إيه الفرق بين CTR وCPC؟

الـ CTR نسبة الضغط، والـ CPC تكلفة الضغطة. لما الـ CTR يعلى، تكلفة الضغطة بتقل لأن نفس مرات الظهور بتجيب ضغطات أكتر.
