---
title: "مولّد Schema"
description: "اختار النوع واملا البيانات، وخُد كود Schema بصيغة JSON-LD جاهز تحطه في الصفحة: أسئلة شائعة، أو نشاط محلي بالعنوان والمواعيد، أو بيانات الشركة، أو مقال. من غير ما تكتب سطر…"
url: "https://ahmed-abdelhamed.com/tools/schema-markup-generator/"
date_published: "2026-11-11T15:50:24+00:00"
date_modified: "2026-11-20T02:54:45+00:00"
author: "أحمد عبد الحميد"
---

# مولّد Schema

اختار النوع واملا البيانات، وخُد **كود Schema بصيغة JSON-LD** جاهز تحطه في الصفحة: أسئلة شائعة، أو نشاط محلي بالعنوان والمواعيد، أو بيانات الشركة، أو مقال. من غير ما تكتب سطر كود.

## يعني إيه Schema أو البيانات المنظّمة؟

**Schema** كود بيوصف محتوى الصفحة بلغة تفهمها محركات البحث: ده مقال كاتبه فلان، ودي عيادة عنوانها كذا ومواعيدها كذا، ودي أسئلة وإجاباتها. الكود بيتكتب بصيغة **JSON-LD** اللي جوجل بينصح بيها، وبيتحط في الصفحة من غير ما يظهر للزوار.

البيانات المنظّمة بتساعد جوجل وأدوات الذكاء الاصطناعي يفهموا صفحتك بدقة، وبتخلّي الصفحة **مؤهلة** لأشكال نتايج مميزة زي معلومات النشاط وصورة المقال. لكنها مش ضمان إن الشكل المميز يظهر، ومش عامل ترتيب مباشر.

## أنهي نوع تستخدمه؟

- **FAQPage**: لصفحة فيها أسئلة وإجابات ظاهرة للزوار. جوجل قلّل عرض الأسئلة في النتايج لمواقع قليلة، لكن الكود لسه بيساعد في فهم المحتوى.
- **LocalBusiness**: لأي نشاط ليه مكان بيستقبل فيه عملاء: عيادة، محل، مطعم، مكتب. اختار النوع الأدق (Dentist أحسن من LocalBusiness لعيادة أسنان).
- **Organization**: بيانات الشركة واللوجو وحسابات السوشيال، وغالبًا بتتحط في الصفحة الرئيسية بس.
- **Article**: للمقالات والأخبار: العنوان والكاتب وتاريخ النشر والتعديل.

## إزاي تحط الكود في موقعك

1. **ووردبريس**: إضافات السيو زي Yoast وRank Math بتعمل Organization وArticle لوحدها، فما تكررهمش. للأنواع التانية، حط الكود في بلوك «HTML مخصص» في الصفحة.
2. **أي موقع تاني**: حط الكود جوه `<head>` أو في أي مكان في `<body>`.
3. **اختبره** بأداة Rich Results Test من جوجل، وبعد النشر تابع تقرير «التحسينات» في Search Console.

أهم قاعدة: **كل اللي في الكود لازم يكون ظاهر في الصفحة**. لو حطيت أسئلة أو تقييمات مش موجودة للزوار، جوجل ممكن يعتبرها بيانات مضللة.

## أسئلة شائعة

### هل Schema بتحسّن الترتيب في جوجل؟

مش بشكل مباشر. لكنها بتساعد جوجل يفهم الصفحة، وبتخلّيها مؤهلة لنتايج مميزة ممكن ترفع نسبة الضغط.

### أحط كود Schema فين بالظبط؟

في أي مكان في الصفحة: جوه head أو body. في ووردبريس، بلوك «HTML مخصص» في الصفحة نفسها كفاية.

### ينفع أحط أكتر من نوع في نفس الصفحة؟

أيوه، طالما كل نوع بيوصف حاجة موجودة فعلًا في الصفحة. مثلًا مقال فيه أسئلة شائعة ممكن يبقى عليه Article وFAQPage.

### Yoast بيعمل Schema لوحده؟

أيوه، Yoast بيعمل WebPage وOrganization أو Person وArticle تلقائيًا. استخدم الأداة للأنواع اللي مش بيعملها، زي LocalBusiness التفصيلي وFAQPage.
