سكريبت إعلان فيديو: قوالب جاهزة تعدّلها حسب منتجك

سكريبت إعلان الفيديو الكويس مش كلام حلو، هو ترتيب: جملة أولى بتوقف الإيد عن التمرير، وبعدها المشكلة اللي العميل عارفها، والحل بيتشاف قدامه، ودليل صغير يطمّنه، وفي الآخر خطوة واحدة واضحة يعملها. القوالب اللي تحت مبنية على الترتيب ده، بطولين: 15 ثانية للريلز والستوري، و30 ثانية للفيد ولما المنتج محتاج شرح أكتر. خد القالب اللي يناسب منتجك، وبدّل الكلام اللي بين القوسين، وعدّل اللهجة على حسب السوق اللي بتعلن فيه.
محتويات المقال
سكريبت إعلان: الهيكل قبل الكلام
قبل أي قالب، دي الأجزاء اللي بيتكون منها أي سكريبت إعلاني ناجح تقريبًا:
| الجزء | وقته التقريبي في فيديو 30 ثانية | وظيفته |
|---|---|---|
| الهوك | أول تلات ثواني | يوقف الشخص عن التمرير |
| المشكلة | لحد ثانية 8 تقريبًا | العميل يحس إن الكلام عنه |
| الحل | لحد ثانية 20 تقريبًا | المنتج بيتشاف وهو بيحل المشكلة |
| الدليل | ثواني قليلة | تجربة، أو نتيجة، أو رقم مثبت |
| العرض والخطوة | آخر خمس ثواني | يعمل إيه دلوقتي |
الأوقات دي تقريبية، والفكرة إن كل جزء ليه وظيفة. وفي فيديو 15 ثانية، المشكلة والحل بيتدمجوا تقريبًا. وتفاصيل أنواع الهوك والإضاءة والصوت والمقاس موجودة في إعلانات الفيديو والريلز: أول 3 ثواني اللي بتحدد النتيجة. هنا الكلام نفسه.
قالب مشكلة وحل
ده أكتر قالب بيتستخدم، ومناسب لأي منتج بيحل مشكلة واضحة: أدوات، منتجات تنضيف، خدمات، تطبيقات.
نسخة 15 ثانية
[الهوك، مع لقطة للمشكلة]: لسه بتقضي [وقت أو مجهود] في [المشكلة]؟
[لقطة المنتج بيشتغل]: [اسم المنتج] بيخلّص [المهمة] في [نتيجة واضحة]، شوف بنفسك.
[لقطة النتيجة]: [النتيجة قدام الكاميرا].
[العرض]: اطلبه دلوقتي من [المكان]، و[ميزة الطلب زي الشحن أو الضمان].
نسخة 30 ثانية
[الهوك]: كنت فاكر إن [المشكلة] مالهاش حل غير [الحل المتعب اللي الناس بتعمله].
[المشكلة بتفاصيلها]: كل مرة [موقف حقيقي من حياة العميل]، و[النتيجة المزعجة].
[الحل]: لحد ما جربت [اسم المنتج]. بص: [خطوة استخدام أولى]، و[خطوة تانية].
[النتيجة]: [النتيجة قدام الكاميرا في لقطة واحدة واضحة].
[الدليل]: [تقييم عميل حقيقي، أو ضمان، أو معلومة مثبتة عن المنتج].
[العرض والخطوة]: اطلبه من [المكان]، و[ميزة الطلب]. الرابط تحت.
قالب تجربة عميل
مناسب جدًا لمنتجات العناية والأكل والخدمات، اللي العميل محتاج يسمع تجربة حد زيه قبل ما يقرر. والأحسن يتصوّر بموبايل وبشخص حقيقي، بأسلوب محتوى العملاء اللي شرحته في محتوى UGC وليه بيبيع أكتر.
نسخة 30 ثانية
[الهوك، الشخص بيكلم الكاميرا]: هقولكم بصراحة على [المنتج] بعد [مدة الاستخدام].
[قبل]: أنا كنت [المشكلة أو التردد]، وجربت [حلول تانية] ومنفعتش معايا لأن [سبب].
[الاستخدام]: بستخدمه كده: [لقطة الاستخدام].
[الفرق]: اللي لاحظته [فرق حقيقي محدد، مش مبالغة].
[الملاحظة الصادقة]: العيب الوحيد إن [عيب بسيط حقيقي]، بس [ليه مش فارق معاه].
[الخطوة]: لو عندك نفس المشكلة، اللينك تحت.
نسخة 15 ثانية
[الهوك، الشخص ماسك المنتج]: أنا كنت مش مصدّق [المنتج] لحد ما جربته.
[لقطة الاستخدام]: [خطوة استخدام واحدة واضحة].
[الفرق]: والنتيجة؟ [فرق حقيقي في جملة قصيرة].
[الخطوة]: جربه بنفسك، اللينك تحت.
النسخة القصيرة دي مناسبة للستوري، وبتشتغل أحسن لو الشخص بيتكلم بطريقته العادية من غير ما يحفظ الكلام حرفيًا. اديله النقط بس، وخليه يقولها بأسلوبه، وصوّر أكتر من محاولة واختار الأطبع.
الملاحظة الصادقة عن عيب بسيط مش بتقلل البيع، بالعكس، بتخلي التجربة كلها تتصدق. بس لازم تكون حقيقية من العميل نفسه، ومتكتبش تجربة على لسان حد ماجربش. ولو المنتج صحي أو تجميلي، ابعد عن أي وعد بنتيجة مضمونة أو مدة محددة.
قالب قبل وبعد
مناسب للتنضيف، والتصليح، والتنظيم، والتجميل في حدود السياسات، وأي خدمة نتيجتها بتتشاف.
نسخة 15 ثانية
[لقطة قبل، بدون كلام أو بكلمة واحدة]: ده كان [المكان أو الشيء] من [مدة].
[لقطات سريعة للشغل أو المنتج].
[لقطة بعد، بنفس الزاوية]: وده دلوقتي.
[الخطوة]: عايز نفس النتيجة؟ [طريقة الحجز أو الطلب].
نسخة 30 ثانية
[الهوك، لقطة قبل]: محدش كان متخيل إن [المكان أو الشيء] ده يرجع زي الأول.
[السبب]: [صاحب المكان] كان جرب [حل تاني] ومنفعش، عشان [سبب].
[الشغل]: لقطات سريعة لخطوات الشغل، مع جملة عن كل خطوة: [الخطوة الأولى]، [الخطوة التانية].
[لقطة بعد، بنفس الزاوية]: وده بعد [مدة الشغل الحقيقية].
[الدليل]: [كلمة من صاحب المكان، أو صورة لتقييم حقيقي].
[الخطوة]: احجز معاينة من [المكان]، و[ميزة زي معاينة من غير التزام].
النسخة الطويلة مناسبة للخدمات اللي سعرها أعلى، لأن العميل محتاج يشوف إن فيه شغل حقيقي ورا النتيجة، مش بس لقطتين.
السر هنا إن لقطة القبل ولقطة البعد يبقوا من نفس الزاوية ونفس الإضاءة، وإلا المقارنة متتصدقش. ومتعدّلش صورة القبل عشان تبان أسوأ.
سكريبت إعلان سعودي: تعديل اللهجة من غير ما يبان مترجم
السكريبت المكتوب بالمصري لما يتقري بلهجة خليجية من غير تعديل بيبان مترجم، والجمهور بيحس بده فورًا. التعديل مش بس كلمات، ده إيقاع وطريقة كلام:
| بالمصري | باللهجة السعودية الشائعة |
|---|---|
| عايز | أبغى |
| دلوقتي | الحين |
| إزاي | كيف |
| إيه | وش |
| كويس أوي | زين مرّة |
| بص | شوف |
الجدول ده بداية بس. اللهجات في السعودية نفسها مختلفة بين المناطق، فالأفضل إن اللي يقرا السكريبت يكون من نفس السوق، ويعدّله بطريقته وهو بيتكلم مش وهو بيقرا. وكمان المواقف اللي في السكريبت لازم تبقى من حياة الجمهور هناك: المشوار، والجو، والمناسبات. ولو بتعلن على أكتر من منصة في الخليج، طبيعة كل منصة مختلفة، زي ما في إعلانات سناب شات وإعلانات تيك توك.
خطوات كتابة سكريبت إعلان من الصفر
- حدد العميل والمشكلة بجملة واحدة: «ست بيت بتتعب في تنضيف الدهون من البوتجاز».
- اختار زاوية البيع: الوقت، ولا التوفير، ولا النتيجة، ولا الثقة. المفهوم في زاوية البيع Angle.
- اختار القالب: مشكلة وحل، ولا تجربة عميل، ولا قبل وبعد.
- اكتب الهوك بتلات صيغ مختلفة: وجرّبهم كلهم، لأن الهوك أكتر حاجة بتفرق.
- اقرا السكريبت بصوت عالي: لو حاجة صعبة تتقال، هتبقى صعبة تتسمع.
- صوّر بنفس السكريبت أكتر من نسخة: واختبرهم، وقيس قوة البداية بمقاييس زي Hook Rate وHold Rate.
والقواعد العامة للكلام اللي بيبيع من غير مبالغة موجودة في كوبي رايتنج: إزاي تكتب كلام يبيع، والنص المكتوب اللي بيظهر جنب الفيديو في كتابة إعلان فيسبوك.
مثال افتراضي: سكريبت لمنتج تنضيف
خد المثال ده كتوضيح افتراضي، مش أرقام من عميل حقيقي. منتج رشاش بينضف الدهون من المطبخ.
[ست بترش على بوتجاز عليه دهون]: الدهون دي كنت بقعد عليها نص ساعة بالسلك.
[بتمسح مرة واحدة]: رشة، ودقيقة، ومسحة.
[لقطة البوتجاز نضيف]: ومن غير ما أحك.
[العلبة في إيدها]: موجود عند [المتجر]، والتوصيل لحد البيت.
السكريبت ده 15 ثانية تقريبًا، ومبني على قالب المشكلة والحل. لو اتعمل بنسخة تانية بهوك مختلف زي «جربت كل حاجة على دهون المطبخ؟»، الاختبار بين الاتنين هو اللي يقرر.
أخطاء شائعة في سكريبت الإعلان
- البداية بالاسم أو اللوجو. محدش بيوقف عشان اسم براند مايعرفوش.
- الكلام عن المنتج قبل المشكلة. العميل لازم يحس إن الكلام عنه الأول.
- وعود مبالغ فيها. «هيغيّر حياتك» بتخلّي الناس تشك، وفي بعض المجالات بتسبب رفض الإعلان.
- أكتر من رسالة في فيديو واحد. كل فيديو فكرة واحدة.
- مفيش خطوة واضحة في الآخر. العميل لازم يعرف يعمل إيه.
- سكريبت مترجم حرفيًا للهجة تانية. بيبان مصطنع.
إمتى تحتاج حد يكتب ويختبر معاك
القوالب دي تقدر تبدأ بيها بنفسك، وتصوّر بموبايلك. لكن لما الإعلانات بقت هي مصدر مبيعاتك، ومحتاج سكريبتات بزوايا مختلفة، واختبارات منظمة للهوك، وقراءة أي فيديو بيجيب أرخص بيعة، ده بالظبط الشغل اللي بعمله في إدارة الحملات الإعلانية. ولو بتفكر تعمل الفيديو بأدوات الذكاء الاصطناعي، حدودها موضحة في عمل فيديو إعلاني بالذكاء الاصطناعي.
الصوت والدعوة للتواصل جوه الفيديو
نبرة الصوت بتبيع أو بتطفّش
نفس سكريبت الإعلان ممكن ينجح أو يفشل حسب طريقة قوله. النبرة المتوترة، أو اللي فيها توسل، أو الصريخ والحماس المبالغ فيه، بتوصل للمشاهد إن البياع محتاج البيعة أكتر ما هو واثق في منتجه. والنبرة الهادية الواثقة، كأنك بتنصح صاحبك، بتوصل العكس.
نصايح عملية قبل التسجيل:
- سجّل بروفة واسمعها: انت هتلاحظ حاجات ما تحسهاش وانت بتتكلم.
- اتكلم أبطأ شوية من العادي: التوتر بيسرّع الكلام.
- ابتسم وانت بتتكلم: بتبان في الصوت حتى لو الوش مش ظاهر.
- ما تعليش صوتك عشان تبان متحمس: الحماس الحقيقي بيبان في الكلام نفسه.
بيانات التواصل والدعوة تفضل ظاهرة
فيديوهات كتير بتشرح كويس جدًا، وفي الآخر المشاهد مش عارف يعمل إيه. خلي الدعوة واضحة في الكلام والصورة مع بعض: “ابعتلنا على الواتساب” ومعاها الرقم أو الزرار ظاهر. وفي الفيديو الطويل شوية، خلي طريقة التواصل ظاهرة في جزء من الشاشة طول الفيديو أو في آخر تلات ثواني على الأقل. ولو عايز الفيديو يحكي قصة بدل ما يعدد مميزات، شوف ستوري تيلينج في التسويق.
كمّل القراءة: ستوري تيلينج في التسويق: إزاي تستخدم القصة في إعلانك وموقعك عشان تبيع.
أسئلة شائعة
سكريبت الإعلان يكون طوله قد إيه؟
للريلز والستوري غالبًا 15 ثانية أو أقل، وللفيد ولما المنتج محتاج شرح ممكن 30 ثانية. المهم كل ثانية يكون ليها وظيفة.
إيه أهم جزء في سكريبت الإعلان؟
الهوك في أول تلات ثواني، لأنه بيحدد الشخص هيكمّل ولا هيعدي. اكتب أكتر من نسخة منه واختبرهم.
ينفع أستخدم نفس السكريبت في مصر والسعودية؟
الفكرة ممكن تبقى نفسها، بس الكلام والمواقف لازم تتعدّل للهجة وحياة كل سوق، وأحسن حد يعدّلها حد من نفس السوق.
أكتب السكريبت بالفصحى ولا العامية؟
في إعلانات السوشيال غالبًا العامية أقرب، لأنها بتبان كلام حقيقي مش إعلان. الفصحى المبسطة ممكن تنفع في مجالات رسمية أو لجمهور متنوع.
لو عايز سكريبت إعلان لمنتجك بأكتر من زاوية، وخطة اختبار تعرف منها أنهي فيديو بيبيع، ابعتلي منتجك وجمهورك في استشارة ونرتب أول سكريبتات والاختبار.