الإعلانات والتجارة الإلكترونية · مجانية · من غير تسجيل

حاسبة صافي الربح الحقيقي والتدفق النقدي للمتجر

متجرك ممكن يبقى كسبان على الورق وفلوسه بتخلص. الحاسبة بتطرح المرتجعات والشحن والعمولات والمصاريف الثابتة علشان تطلّع ربحك الحقيقي، وبترسم الكاش اللي في إيدك يوم بيوم، لأن شركة الشحن بتحوّلك فلوسك بعد أيام.

أرقام متجرك

الأرقام المكتوبة مثال لمتجر بيبيع بالدفع عند الاستلام، غيّرها بأرقامك. استخدم أي عملة، المهم نفس العملة في كل الخانات.

1. المنتج والإعلان

2. المرتجعات والتكاليف المنسية

3. الكاش والتحصيل

بتدفع للمورد إمتى؟
الشحن بيتدفع إزاي؟
صافي ربحك الحقيقي في الشهر—

صافي مكسب الأوردر المتسلّم—
تكلفة الإعلان الحقيقية للأوردر المتسلّم—
الكاش بيخلص إمتى؟—
نقطة التعادل الحقيقية—
فلوسك اللي عند شركة الشحن في أي وقت—ودي فلوس كسبتها بس لسه مش في إيدك

الكاش في إيدك يوم بيوم لمدة 60 يوم

المصاريف الثابتة بتتخصم يوم 30 ويوم 60 (المرتبات والإيجار آخر الشهر)، علشان كده المنحنى بينزل فجأة هناك.

الافتراضات: الأوردر المرتجع مش بيجيب إيراد والمنتج بيرجع المخزن بعد نفس مدة التحصيل، والإعلان والشحن بيتدفعوا على كل أوردر خارج، والمبيعات ثابتة كل يوم. الحاسبة تقدير للتخطيط، مش بديل عن حسابات المتجر الفعلية.

كل الحساب بيتم في المتصفح بتاعك، ومفيش أي بيانات بتتبعت.

ليه ربح الورق بيضحك عليك؟

أغلب أصحاب المتاجر بيحسبوا المكسب كده: سعر البيع ناقص تكلفة المنتج ناقص تكلفة الإعلان. منتج بـ 600، تكلفته 250، وإعلانه 90، يبقى المكسب 260 في الأوردر. و15 أوردر في اليوم يبقى 117 ألف في الشهر، ناقص 25 ألف مصاريف ثابتة، يعني 92 ألف صافي.

الرقم ده غلط في الدفع عند الاستلام لأنه ناسي 4 حاجات، والحاسبة اللي فوق بتحسبهم كلهم:

  1. المرتجعات ورفض الاستلام: لو 25% من الأوردرات رجعت، إنت دفعت إعلانها وشحنها وما خدتش منها جنيه. فتكلفة الإعلان الحقيقية للأوردر اللي اتسلّم بتبقى 90 ÷ 0.75 = 120 مش 90.
  2. الشحن والتغليف على كل أوردر خرج، اتسلّم أو رجع.
  3. العمولات والهالك: عمولة التحصيل أو بوابة الدفع، والمنتجات اللي بترجع بايظة.
  4. المصاريف الثابتة اللي لازم تتغطي من الأوردرات اللي اتسلّمت بس، مش من كل الأوردرات.

بنفس الأرقام دي، الربح الحقيقي بيطلع حوالي 26 ألف في الشهر مش 92. وصافي مكسب الأوردر المتسلّم 152 مش 260. لو عايز تفهم حساب تكلفة الأوردر بالتفصيل، اقرأ حساب ربح المنتج.

كسبان على الورق والكاش خلص: إزاي ده بيحصل؟

حتى لو الـ 26 ألف دول حقيقيين، ممكن الكاش يخلص من إيدك. السبب إن الفلوس بتطلع وتدخل في أوقات مختلفة:

  • الإعلان بيتدفع النهارده.
  • البضاعة بتتدفع النهارده (لو بتشتري كاش).
  • فلوس الأوردر بترجعلك بعد 10 لـ 21 يوم حسب شركة الشحن، ومخصوم منها الشحن والعمولة.

يعني أول أسبوعين بتصرف كل يوم ومفيش ولا جنيه داخل. في المثال اللي فوق، الكاش (60 ألف) بيخلص يوم 12، ومحتاج حوالي 11 ألف زيادة علشان تعدّي لحد ما التحصيل يبدأ. وبعدها يوم 30 المرتبات والإيجار بينزّلوا الرصيد تاني. ده اللي المنحنى بيوريهولك.

وخد بالك من رقم «فلوسك اللي عند شركة الشحن»: في المثال ده أكتر من 80 ألف في أي وقت. دي فلوس كسبتها، بس محبوسة في الدورة. وكل ما تكبّر الميزانية، الرقم ده بيكبر معاها، وعلشان كده متاجر كتير بتقع وهي بتكبر مش وهي صغيرة.

تحل فجوة السيولة إزاي؟

  1. قلّل المرتجعات قبل أي حاجة. كل نقطة مرتجع أقل بتوفر إعلان وشحن وبتدخّل فلوس أسرع. تأكيد الأوردر على واتساب قبل الشحن غالبًا أرخص طريقة، وشرحتها في تقليل رفض الاستلام في مصر.
  2. حوّل جزء من العملاء للدفع أونلاين. الفلوس بتوصلك أسرع والمرتجع بيقل. شوف بوابات الدفع في مصر.
  3. فاوض على مدة التحصيل. بعض شركات الشحن بتحوّل أسبوعيًا أو أسرع لو حجمك كبير. قارن في مقارنة شركات الشحن.
  4. اطلب أجل من المورد. جرّب خيار «بعد 15 يوم» في الحاسبة وشوف المنحنى بيتغيّر قد إيه.
  5. كبّر الميزانية على مراحل. مش مرة واحدة، لأن كل زيادة محتاجة كاش يغطي أول أسبوعين قبل ما فلوسها ترجع.

نقطة التعادل الحقيقية

نقطة التعادل العادية بتقسم المصاريف الثابتة على مكسب القطعة. الحاسبة دي بتعملها على المكسب بعد المرتجعات، وبتطلّع الرقم كأوردرات مطلوبة في اليوم، لأن ده الرقم اللي بتشوفه في المتجر وفي مدير الإعلانات. لو عايز الطريقة العادية خطوة بخطوة، اقرأ نقطة التعادل. ولو عايز تعرف أقل ROAS تقدر تشتغل عنده، استخدم حاسبة ROAS التعادل.

أسئلة شائعة

إيه الفرق بين صافي الربح والتدفق النقدي؟

صافي الربح بيقولك كسبت كام على مدار الشهر. التدفق النقدي بيقولك الفلوس في إيدك كام كل يوم. ممكن تكون كسبان 26 ألف في الشهر والكاش يخلص يوم 12، لأنك بتدفع الإعلان والبضاعة النهارده والتحصيل بيوصلك بعد أسبوعين.

إزاي أحسب صافي الربح الحقيقي لمتجر بيبيع بالدفع عند الاستلام؟

اطرح من إيراد الأوردرات اللي اتسلّمت بس: تكلفة منتجاتها، والعمولات، وتكلفة الإعلان على كل الأوردرات (حتى المرتجعة)، والشحن على كل الأوردرات اللي خرجت، ورسوم المرتجع، والمصاريف الثابتة. الحاسبة بتعمل ده كله.

ليه تكلفة الإعلان الحقيقية أعلى من الرقم اللي في مدير الإعلانات؟

لأن مدير الإعلانات بيقسم الصرف على كل الأوردرات، والمرتجعة منها كمان. لو 25% رجعت، يبقى الصرف اتوزّع فعلًا على 75% بس. فتكلفة الإعلان للأوردر المتسلّم = تكلفة الأوردر ÷ (1 − نسبة المرتجع).

محتاج كاش قد إيه علشان أبدأ متجر؟

على الأقل اللي يغطي الإعلان والبضاعة والشحن لحد ما أول تحويل من شركة الشحن يوصلك، ومعاه مصاريف أول شهر الثابتة. اكتب أرقامك وحط الكاش صفر، وأقل رصيد هيظهر في المنحنى بالسالب: ده تقريبًا رأس المال العامل اللي محتاجه.

الحاسبة بتحفظ أرقامي؟

لأ. كل الحساب بيتم في المتصفح بتاعك، ومفيش أي رقم بيتبعت أو بيتحفظ.

English version of this tool