الإعلانات والتجارة الإلكترونية · مجانية · من غير تسجيل
تشخيص ضعف المبيعات: اعرف ليه إعلاناتك مش بتبيع في دقيقتين
أغلب اللي بيقولوا "الإعلانات مش شغالة" المشكلة عندهم في حتة تانية خالص. جاوب على 13 سؤال سريع، وخُد درجة لكل محور وأكبر نقطة ضعف عندك و3 خطوات تصلّحها بيهم. من غير تسجيل ولا رقم تليفون.
كل الحساب بيتم في المتصفح بتاعك، ومفيش أي بيانات بتتبعت.
ليه الإعلانات بتصرف والمبيعات ضعيفة؟
لما المبيعات تقل، أول متهم بيبقى الإعلان. وده ساعات صح، بس في أغلب الحسابات اللي براجعها، الإعلان بيجيب ناس فعلًا، والمشكلة بتبقى في اللي بعده: عرض مش واضح، أو سعر من غير سبب، أو موقع بيطفّش، أو رد متأخر، أو مفيش متابعة. وفي كل الحالات دي، تغيير الإعلان أو زيادة الميزانية مش بيحل حاجة، وأحيانًا بيزود الخسارة.
الخمس محاور اللي الأداة بتقيسها
- العرض والسعر: السعر ظاهر إزاي، وهل الطلب مكسّب بعد الإعلان والشحن. اقرا تسعير المنتجات.
- الإعلان والاستهداف: الفكرة والكرييتف والجمهور.
- الموقع وتجربة العميل: السرعة، وخطوات الطلب، والثقة في الصفحة. اقرا تجربة العملاء.
- البيع والرد على الرسايل: سرعة الرد، وفرز العميل الجاد، والتعامل مع "غالي"، والمتابعة. اقرا تأهيل العملاء المحتملين.
- القياس والأرقام: هل عارف أنهي إعلان بيبيع فعلًا.
تستخدم النتيجة إزاي؟
ابدأ بأضعف محور بس، ونفّذ الخطوات التلاتة اللي ظاهرة لك لمدة أسبوعين، وبعدين اعمل الاختبار تاني. ما تصلّحش كل حاجة مرة واحدة، لأنك ساعتها مش هتعرف أنهي تعديل هو اللي فرق. ولو أضعف محور طلع الإعلان أو القياس، مراجعة الحساب الإعلاني غالبًا بتوفر عليك أسابيع تجارب. التفاصيل في مراجعة الحساب الإعلاني.
أسئلة شائعة
هل النتيجة دقيقة؟
الأداة بتديك اتجاه، مش تشخيص نهائي. هي مبنية على الأسباب اللي بتتكرر في الحسابات اللي براجعها، بس كل نشاط ليه تفاصيله. استخدمها عشان تعرف تبدأ منين، وراجع الأرقام الحقيقية قبل أي قرار كبير.
محتاج أدخل بياناتي أو رقمي؟
لأ. كل الحساب بيتم في المتصفح بتاعك ومفيش أي حاجة بتتبعت. ولو حبيت تبعتلي النتيجة على واتساب، ده اختياري بزرار في الآخر.
لو أضعف محور طلع الإعلان، أوقف الإعلانات؟
لأ. ابدأ بتجربة أفكار مختلفة للإعلان وتظبيط الجمهور بنفس الميزانية، وقيس بتكلفة الطلب مش بعدد الرسايل. التوقف الكامل بيخلي المنصة تبدأ تتعلم من الأول.
أعمل الاختبار كل قد إيه؟
بعد ما تنفذ خطوات أضعف محور بأسبوعين أو تلاتة. لو الدرجة اتحسنت، انتقل للمحور اللي بعده.